Síðasta kvöldmáltíðin

Síðasta kvöldmáltíðin búin (kjöt í karrý) og ekkert eftir nema stundin um kvöl frelsarans framundan. Á æskuárum var þessi tími ungum eirðarlausum pilti mikil áraun. Maður mátti bókstaflega EKKERT gera heima fyrir. Þegar maður komst á unglingsár var það helsta dægrarstytting okkar vinanna að bíða í röð við nætursöluna, sem opnaði á miðnætti föstudagins langa. Það var eins og þungu fargi væri létt af okkur þegar lúgan opnaði og hægt var að kaupa kók og prins - hvílíkt frelsi. Svo liðu árin og kröfur um heilagleika á þessum degi slökknuðu. Ég man þegar maður gat farið á skíði í Bláfjöllum. Jafnvel búðir eru nú í einhverju mæli opnar. Við höfum mörg undanfarn ár ýmist verið í Svíþjóð á þessum tíma eða skroppið austur í Skaftártungu. Það er löngu búið að fella niður flugið okkar til Köben. Þá var Tungan ein í boði þar til maðurinn í svörtu fötunum, hann Víðir skipaði okkur að halda okkur heima. Hver vill ekki hlíða Víði. Er ekki eins með ykkur?

Dánartíðni, samanburður á Íslandi og Svíþjóð

Dánartíðni í dag þann 1. apríl m.v. 100 þúsund íbúa er 1,11 hér á landi. Sambærileg tala í Svíþjóð á þessum degi er 2,77 Greindir sýktir hér á landi eru 1.319 en í Svíþjóð einungis 5.466 Greindir sýktir á Íslandi m.v. 100 þúsund íbúa eru því 366 en í Svíþjóð einungis 54 á sama mælikvarða. Hvað segir þetta okkur? Er það vegna þess að við höfum verið duglegri að skima fólk fyrir veirunni? Líklega skiptir það sköpum vegna þess að sambærileg skimun hefur ekki átt sér stað þar. Ef útbreiðslan er með sambærilegum hætti í Svíþjóð og hér á landi hljóta að vera töluvert fleiri þar sem enn eru ekki greindir en eru smitaðir. Þannig má ætla miðað við þessar tölur að 30 þúsund manns séu ógreindir í Svíþjóð smitaðir og þá smitberar.da

Uppáhalds sálmurinn

Leyfi mér hér að birta uppáhalds sálminn hans föður míns Sr Hjartar Hjartarsonar sem er nr. 350 í sálmabókinni. Hann kom þessum sálmi oft að og organistar sem hann vann með vissu það. Skemmtilegt að segja frá því að einn organisti tók sig einu sinni til og spilaði hann sem útgöngspil, vegna þess að hann sá pabba meðal kirkjugesta. Óhætt er að segja um pabba að hann var æðrulaus maður, þótt ekki væri hann skaplaus. Hann þurfti oft á lífsleiðinni að takast á við ýmis áföll. Hann fékk barna- og lömunarveiki sem ungur drengur, missti bróður sinn úr sömu veiki. Þá tókst hann á við krabbamein síðustu 15 ár ævi sinnar af miklu æðruleysi. Vonandi finnið þið styrk og huggun í þessum ljóðlínum líka:

Ó, ást, sem faðmar allt! Í þér
minn andi þreyttur hvílir sig,
þér fús ég offra öllu hér,
í undradjúp þitt varpa mér.
Þín miskunn lífgar mig.

Ó, fagra lífsins ljós, er skín
og lýsir mér í gleði og þraut,
mitt veika skar það deyr og dvín,
ó, Drottinn minn, ég flý til þín,
í dagsins skæra skaut.

Ó, gleði', er skín á götu manns
í gegnum lífsins sorgarský.
Hinn skúradimmi skýjafans
er skreyttur litum regnbogans
og sólin sést á ný.

Ó, ég vil elska Kristi kross,
er kraft og sigur veitir mér.
Að engu met ég heimsins hnoss,
því Herrann Jesús gefur oss
það líf, sem eilíft er.

Spænska flensan uppfærð

Í ársyrjun 1918 voru Íslendingar rúmlega 92 þúsund talsins. Alls er talið að 484 hafi látist hér á landi úr spönsku veikinni. Miðað við sama hlutfall í dag mundi það þýða að um 1888 manns hefðu dáið en við erum um 360 þúsund núna. Við getum því lifað í þeirri von að staðan núna sé töluvert betri miðað við þær spár sem kynntar hafa verið opinberlega frá okkar færustu lýðheilsufræðingum varðandi covid. Ljóstýra í myrkrinu?

Covid 19 - heimsfaraldur

Allt í heiminum snýst um þennan heimsfaraldur Covid 19 og er faraldurinn þegar farinn að hafa mikil áhrif á líf okkar. Frá 14. mars erum við búin að vera aðallega heimavið, í sjálfskipaðri sóttkví. Þetta er þrúgandi staða og vonandi gengur þessi faraldur fljótt yfir með sem minnstum skaða fyrir alla. Annars byrjaði þetta ár ágætlega. Við höfðum nóg að gera í janúar og febrúar. Ég var leiðsögumaður og stundum keyrandi sem slíkur. Við fórum til Belgíu í byrjun mars og komum heim 6. mars. Þá var farið að tala um þessa vírusveiki. Ég fór í eina ferð 13. og 14 mars og hafði þá ferðamönnum fækkað til mikilla muna. Með mér í Gullna hringnum voru þrír gestir. Í þar síðustu ferð voru þeir 15 með í ferðinni á 19 manna springer. Nú eru engar skráðar ferðir.

Gleðilegt ár

Gleðilegt ár! Þetta er 16 árið sem þessari heimasíðu er haldið út en segja má að facebook hafi tekið yfir hlutverk hennar að mestu fyrir 12 árum síðan.

Upphaf byggingarsögu - óvænt niðurstaða.

Við keyptum lóð, sökkla og teikningar að einbýlishúsi 1983. Sáum auglýsingu í mbl en gerðum ekkert í því í fyrstu, en svo birtist auglýsingin aftur skömmu fyrir jól. Ég hafði samband við kunningja minn sem bjó í þessu hverfi. Hann upplýsti mig um að þetta væri besta lóðin í hverfinu (bótalóð), hvað staðsetningu varðar. Hann ráðlagði mér að bjóða uppsett verð, þá 750 þúsund krónur, það þýddi ekkert að prútta við eigandann. Við fórum að þessu ráði eftir að hafa skoðað teikningar og hugsað málið yfir helgi. Á mánudeginum hafði fasteignasalinn samband við mig og upplýsti að við gætum fengið lóðina og sökkulinn, ef við borguðum 800 þúsund krónur. En við skyldum hafa hraðann á því eigandinn væri að fara úr bænum og óvíst hvenær hann kæmi aftur. Við urðum forviða og ég var sannfærður  um að við hefðum gert mistök að samþykkja uppsett verð. Hringdi í kunningja minn og sagði honum hvernig tilboðinu var tekið. Ég var að sjálfsögðu ósáttur og leiður hvernig fór. Viðbrögð kunningjans komu á óvart. Hann spurði, "Sveinn hafið þið raunverulegan áhuga á þessari eign og þessu verkefni? Ef  þið hafið áhuga þá gangið þið að þessu verði, Það eru margar 50 þúsund krónurnar, sem munu koma til á byggingatímanum sem ekki er búið að gera ráð fyrir." Ég hafði samband við fasteignasalann og gékk að tilboðinu. Frágangur kaupsamningsins var næst á dagskrá og sú stund var ekki síður eftirminnileg. Við höfum nú búið í þessu húsi í 36 ár.