AGGF tuttugu ára.

AGGF félagar. Í gærkvöldi var ég á 20 ára afmælishátið AGGF, leikfimihópsins míns. Ég er búinn að vera félagi í þessum hópi í 19 ár eða allt frá því mín deild var stofnuð. Lengi vel var minn hópur kallaður sjávarútvegshópurinn vegna þess að við vinnufélagarnir vorum allir í þessum hópi, en okkur hefur því miður fækkað og erum við aðeins tveir eftir. Hátíðarræðuna hélt borgarskáldið okkar Þórarinn Eldjárn af þvílíkri snilld að lengi verður í minnum haft. Ég ætla ekki að rekja ræðuna í smáatriðum en hann kom með nýyrði um allt það sem tengist leikfimi og hreyfingu - búkfræði vill hann kalla það vegna þess að það er svo margt tengt þessari þjálfun. Hann fór einnig ítarlega í gegnum það hvernig einelti er vísindalega beitt af fimleikastjóranum til að hvetja okkur áfram og halda samkeppni milli hópanna. Fimmleikastjórinn hafði t.d. nefnt við mig í vikunni hvort ég tæki því nokkuð illa ef félagar í hópnum mundu mæta með handjárn og myndavél til að sækja mig í leikfimina.Það varð nú ekkert úr því sem betur fer. Hann hefur séð hvað ég tók þetta nærri mér. Fyrr um daginn tók ég þátt í ráðstefnu á vegum Straums í gamla Iðnó um efnahagsmál og ESB. Þetta var fyrsta skipti sem ég steig á hið fræga svið gamla leikhússins. Einnig fyrsta skipti sem ég tala á ensku á innlendri ráðstefnu, þar sem flestir voru Íslendingar. Á föstudagskvöldið var ég í fimmtugsafmæli fram eftir kvöldi. Í gær fór ég austur í Hveragerði að sækja Sirrý en hún hefur stundað endurhæfingu þar síðastlliðnar fjórar vikur. Þar hitti maður fjölda kunningja sem voru að endurhæfa sig. Óhætt er að mæla með þessum frábæra stað fyrir þá sem þurfa á því að halda. Þetta er það helsta þessa vikuna.

Úr dagsins önn.

Í snúning. Það hefur verið í miklu að snúast þessa vikuna. Í gærkvöldi vorum við í brúðkaupsveislu Sæmundar Karls og Krístínar Helgu. Stórglæsileg veisla sem endaði á því að boðið var upp á lifandi tónlist og dans. Hér má sjá okkur feðginin í léttri sveiflu.

Þreyttir foreldrar. Já það var mikið að gera hjá Valdimari og Stellu þessa helgi. Valdimar var að útskrifast sem BA í lögum frá HÍ. Tók þessa skemmtilegu mynd af þeim þegar þau voru að bíða eftir komu okkar eftir útskriftina.
Valdimar. Valdimar var glaður yfir áfanganum og ekki síður trompetinum sem við gáfum honum í tilefni áfangans. Nú getur hann í frítíma sínum farið að æfa gömlu lögin sem hann var að spila hér á árum áður í Skólahljómsveit Grafarvogs. Að sjálfsögðu fylgir dempari þannig að nágrannar hans þurfa ekki að örvænta.
Súlur. Ég fór keyrandi norður á Akureyri eldsnemma á fimmtudagsmorguninn til þess að taka þátt í ráðstefnu sem var á vegum Háskólans á Akureyri og bar yfirskriftina "Future challenges for the seafood industry". Afar fróðleg ráðstefna með góðum erindum um það sem er helst í döfinni í sjávarútvegi og fiskeldi. Keyrði svo aftur í bæinn á föstudaginn. Þessi mynd er tekin úr Húna ll á Pollinum fyrir framan Akureyri.

Afpöntun takk....

Ég fór á hádegisfyrirlestur í dag í Odda sem bar yfirskriftina fjármálakreppan 2007 - 2010. Fyrirlesari var Robert Wade prófessor við London School of Economics. Fróðlegur fyrirlestur en myndin sem hann málaði upp var æði dökk. Hann vitnaði í breska seðlabankastjórann Melvyn King sem sagði í ræðu í fyrra að "NICE" (non inflationary consistantly expansionary) áratugurinn væri liðinn, sem að sjálfsögðu mætti einnig kalla góða áratuginn upp á íslensku. Það kom upp í huga minn gamall frasi sem eignaður er Tage heitnum Danielsson, sænskum grínista: "Om världens undergång är nära, låt os genast avbeställa den." Í lauslegri íslenskri þýðingu fyrir þá sem ekki skilja sænsku:" Ef heimsendir er í námd, skulum við einhenda okkur í því að afpanta hann." En að öllu gamni slepptu þá var prófessorinn þeirrar skoðunar að bankarnir hefðu ekki staðið sig. Þeir hefðu tekið of mikla áhættu vitandi að samfélagið yrði að taka ábyrgð á þeim ef illa færi vegna samfélagslegs mikilvægis þeirra. Hann taldi að endurskoða yrði reglugerðarverk fjármálageirans vegna þess að í því væru alvarlegir gallar, sem sköpuðu hagsmunaárekstra. Í því sambandi benti hann á þessi matsfyrirtæki sem eru að gefa fjármálastofnunum lánshæfiseinkunnir. Það væru bankarnir sem greiddu lánshæfisfyrirtækjunum þjónustuna og bankarnir gætu sjálfir valið matsfyrirtækin. Matsfyrirtækin eru jafnframt að bjóða bönkum "bankaafurðir" sem eru ekki teknar út af hlutlausum aðilum. Hann kenndi fjáraustri til húsnæðiskaupa í USA um hvernig er komið. Taldi hann að tekið gæti mörg ár að greiða úr vandanum og staðan í bankageiranum ætti aðeins eftir að versna. Við skulum vona að þessi mynd sé ekki jafn slæm og prófessorinn dró upp í þessum fyrirlestri. En líklega vissara að fara varlega á meðan þetta ástand varir.

Á ráðstefnu um dragnót.

Ráðstefnugestir. Ég hef verið á mjög fróðlegri ráðstefnu um dragnótaveiðar í Reykjanesbæ á vegum Samtaka dragnótamanna og Fjölbrautarskóla Suðurnesja sl.tvo daga. Flutt voru mörg áhugaverð erindi um dragnótaveiðar og ýmislegt tengt slíkum veiðum. Fyrirlesarar og ráðstefnugestirnir komu víða að m.a. frá Kanada, Noregi Setlandseyjum, Skotlandi, Hollandi, Frakklandi og Namibíu auk Íslands. Jarðskjálftinn skaut þeim skelk í bringu í gær og líklega mun þeim seint líða þessi atburður úr minni. Niðurstaðan ráðstefnunnar var að dragnótin væri til þess að gera vistvænt og orkugrannt veiðarfæri.
Ólafur Björnsson. Í gær heiðruðu dragnótamenn Ólaf Björnsson fyrrum útvegsmann frá Keflavík í Duushúsi fyrir framlag hans í til varnar dragnótaveiðum á árum áður. Hann er vel ern þótt hann sé tímabundið í hjólastól vegna fótbrots. Í kvöld endaði ráðstefnan á umræðu þátttakenda um efnið og síðan var haldið í Salthúsið í Grindavík þar sem snæddur var sameiginlegur kvöldverður. Menn lýstu yfir almennri ánægju sinni með þessa ráðstefnu. Kveðja.

Fjárfest í bifreið.

Nissan Micra. Það bar helst til tíðinda í þessari viku að Sigrún Huld fjárfesti í nýrri bifreið, Nissan Micra árg. 2004. Þetta er laglegasta bifreið og vonandi að hún komi að góðum notum. Nú er hægt að prútta á bílaútsölum og það gerði hún í gærkvöldi.


Renault R4. Fyrsta bifreiðin sem við keyptum var Renault R4 árgerð ca. 1970. Svona lítil frönsk "dolla" nákvæmlega eins og þessi á myndinni. Hún gékk alltaf en var illa einangruð og sætin voru nú æði einföld. Það mundi enginn láta bjóða sér svona þunna bekki í dag til að sitja án nánast strigi milli stólgrindarinnar. Það var svolítið sérstætt við þessa bifreið að skiptingin var skaft sem stóð út úr mælaborðinu og þurfti svolitla lempni til að skipta um gír. Það hefur annars verið í mörgu að snúast hjá okkur frá því við komum frá Svíþjóð í byrjun vikunnar.

Þennan daginn endaði ég á fundi um loðnurannsóknir á Hótel Loftleiðum, afar fróðleg erindi um loðnurannsóknir auk þess sem sjónarmið atvinnugreinarinnar voru reifuð. Enn eru sviptingar á fjármálamarkaði og verða ugglaust um sinn. Þegar svona óróleiki fer af stað veit enginn hversu lengi hann getur staðið. Við getum þó verið viss um að öll él styttir upp um síðir. Það er hinsvegar alvarlegt mál ef sú kenning Seðlabankans á við rök að styðjast að vísvitandi sé verið að grafa undan íslensku fjármálakerfi. Það þarf að kanna rækilega. Kveðja.

Ráðstefna um hagvöxt.

Fundurinn. Var á ráðstefnu SA í Borgarnesi í dag sem bar yfirskriftina hagvöxtur um allt land. Ráðstefnan tókst í alla staði vel og margt fróðlegt kom þar fram um atvinnumál landsbyggðarinnar. Rifjaðist upp fyrir mér að ég var á samskonar ráðstefnu á sama stað fyrir 18 árum og hélt þar einnig erindi um sjávarútveginn og stöðu hans. Mikið hefur breyst á þessum tæpum tveimur áratugum til batnðar, annað til óþurftar o.s.fr. Ég er sammála því áliti að til þess að komast af verður maður að horfast í augu við breytingar í lífinu. Þarna var einnig sagt frá Landnámssetrinu í Borgarnesi, starfsemi Bónus á landsbyggðinni, hvernig er að starfa sem fræðingur á landsbyggðinni, álversuppbyggingu á Austurlandi, byggðaþróun svo eitthvað sé nefnt. Þarna fóru fram fjörug skoðanaskipti en hvað svo veit náttúrulega enginn. Kveðja.

Kuldatíð.

Það er rosalega kallt úti. Man ekki eftir svona kuldakasti lengi. Þetta er að verða veðurannáll. Það eru nánast veðurlýsingar í hverju bloggi. Hér eru hjá okkur þessa dagana Hjörtur og Ingibjörg með Svein Hjört og Jóhannes Erni. Nú styttist í að þau fari til síns heima í Svearíki, en þau fara á laugardaginn. Maður er bara í sinni rútínu og frá litlu að segja. Var á ráðstefnu í dag þar sem rætt var um ESB. Lítið nýtt sem þar kom fram, sem ekki hefur verið fjallað um áður. Þar fjallaði m.a.dómsmálaráðherra um skýrslu Evrópunefndar, sem hann var formaður fyrir. Meginniðurstaða hans er að okkur sé betur borgið utan ESB en innan þess. Þannig séu líkur til að við munum hafa meiri áhrif í þeim málum sem varða okkur. Síðan fjallaði hagfræðingur frá Landsbankanum ítarlega um evruna, efnahagsmál og erfiðleika á lánsfjármarkaði. Það eru blikur á lofti bæði hér og á alþjóðlegum fjármálamarkaði og betra að fara varlega næstu misseri. Það bar annars til tíðinda að sagt var frá þessari ráðstefnu í fréttum Stöðvar 2 eins og leynifundi. En þetta var einungis lokuð innanhúsráðstefna á vegum SA. Annars lítið að frétta héðan. Kveðja.

Þema gærdagsins: Stjórnmál, menntun og söngur.

Í gær var fyrsti fundur í Rótarýklúbbnum eftir áramótin. Gestur okkar var Ólafur Þ Harðarson stjórnmálaprófessor við HÍ. Hann fór yfir pólitíska þróun í landsmálum frá 1945 og hvernig áhrif stjórnmálamanna hafa verið að breytast á undanförnum árum í ljósi þess að markaðasskipulagið hefur borðið sigur af þeim valkostum sem tekist var á um á 20. öldinni. Annars fór dagurinn í það að sitja ráðstefnu Fjöltækniskólans um menntun og atvinnulífið. Fróðleg ráðstefna um samskipti skóla og atvinnulífs, sem nauðsynlegt er að fara yfir með jöfnu millibili. Framboð á menntun er gríðarlegt og eftirspurn og samkeppni um besta starfsfólkið fer vaxandi. Einstakir skólar verða að vera á tánum, ef þeir ætla halda sínum hlut í framtíðinni. Það gildir líka í þeirra starfi að nú þarf að hugsa einnig um hag nemanda. Í gærkvöldi var svo fyrsta æfing hjá Sköftunum eftir áramótin. Farið var í gegnum nokkur lög sem við vorum að æfa fyrir áramótin. Vetrarstarfið lofar góðu en það vantaði nokkuð marga. Það voru 22 félagar mættir, en það þurfa að vera a.m.k. 30 til þess að það kórinn hljómi vel. Kórinn er orðinn mun samstilltari en áður og sum lögin að verða nokkuð vel slípuð. Vonandi að úr rætist með mætinguna. Kveðja.

Lækjabotnar og hagfræðiráðstefna.

Félagar og Sirrý. Í gær fórum við í áburðardreifingu á landspildu upp í Lækjarbotnum sem er í umsjón Rótarýklúbbs Kópavogs ásamt félögum. Fórum svo kynnisferð um Heiðmörkina í hreint frábæru veðri. Það var í borgarstjóratíð Gunnars Thoroddsens sem hafist var handa við gróðursetningu í Heiðmörk með þessum merkilega árangri.







Eafa ráðstefna. Síðustu tvo daga hef ég sótt ráðstefnu fiskihagfræðinga í Reykjavík. Athyglisverð ráðstefna um fiskihagfræði sem haldin er árlega. Á ráðstefnunni eru um 100 þátttakendur. Flest erindin voru mjög fræðilegs eðlis og byggðu á mikilli stærðfræði, en alltaf síast eitthvað inn þótt það sé að sjálfsögðu misjafnt. Til samanburðar má nefna að á ráðstefnunni um öldrunarmálin í St. Pétursborg er ekki fjarri lagi að hafi verið um 2000 þátttakendur. Annars er það helst í fréttum að veðrið leikur við okkur þessa dagana á meðan rignir heil ósköp víða í Evrópu. Kveðja.

Fréttir frá St. Pétursborg.

Vetrarhöllin og safnið.
Við höfum komið víða við í St. Pétursborg í dag. Heimsótt kirkjur og tekið þátt í bænahaldi ortódoxa hér í bæ á þessum þríheilaga degi þ.e. 7.7.2007. Fórum í "Hermitage" safnið og Vetrarhöllina og skoðum svona það sem fyrir augun bar. Rákumst m.a. á styttu eftir Bertil Torvaldssen. Viða um borgina eru brúðhjón að "pósa" fyrir ljósmyndara. En í blaði hér í borg segir að 77 brúðhjón hafi ákveðið að gifta sig þennan dag. Við höldum að það séu miklu fleiri því þau eru svo mörg sem við höfum séð. Við röltum um miðborgina í dag. Hún er meira og minna byggð fyrir árið 1917 og er mjög glæsileg og vestræn með breiðstrætum sínum. Besta leiðin til þess að ferðast hratt og örugglega um borgina er með neðanjarðarlestum, sem eru með tíðar ferðir vítt og breitt um borgina. Svo notast maður við litla "bússa" til þess að komast á leiðarenda ef það er of langt frá neðanjarðarstöðinni. Það kostar 15 rúblúr að fara með slíkum bíl og ein ferð með neðanjarðarlest kostar það sama. Þetta er svona 60 kr. Í kvöld fórum við á veitingarstað með félögum Sirrýjar sem hún er að vinna verkefni með og borðuðum Stroganoff. Svei mér þá ég held að ég vilji frekar 1944 Stroganoff frá SS. En matarsmekkur getur verið afstæður. Það er mikill uppgangur í borginni það leynir sér ekki. Mikið af nýjum bílum og víða verið að gera við húsnæði. Verðlag er frekar hátt, en ég held það sé ekkert hærra en gengur og gerist í þessum stóru evrópsku borgum. Maður sér mikið af ungu og glæsilegu fólki á ferð í miðbænum, en minna af eldra fólki. Líklega heldur eldra fólkið sig í úthverfunum. Jæja læt þetta duga í bili. Kveðja frá St. Petersborg.

Út í Eyjum...

Innsiglingin. Ég var á ráðstefnu út í Vestmannaeyjum í gær um slysaforvarnir og öryggisstjórnun. Fór með morgunvélinni og kom aftur til baka með síðdegisvélinni. Veðrið var hreint ótrúlegt þennan dag, þótt ekki gæfist tilefni til að njóta þess nema takmarkað. Glaða sólskin og blanka logn. Flug yfir landinu í svona veðri er mikil upplifun. Ég tók þessa mynd á Skansinum af innsiglingunni til Eyja. Við renndum þangað í rástefnulokin.






Fundur um forvarnir. Fundurinn var haldinn á Hótel Þórshamri og var til hans boðað af útvegsbændum. Hafinn er undirbúningur að átaki í slysaforvörnum sem aðilar atvinnulífsins í Eyum munu beita sér fyrir. Mitt hlutverk var að fara yfir nokkrar tölulegar upplýsingar varðandi slysa- og tryggingamál.

Á sjávarútvegssýningu í Brussel.

Furðufiskar . Hér má sjá dæmi um fiska sem þeir veiða sér til matar hinum megin á hnettinum. Þetta eru fiskar sem gat að líta á sjávarútvegssýningunni í Brussel í vikunni. Það voru Ný-Sjálendingar sem sýndu þetta úrval fiska sem í mínum augum voru sannkallaðir furðufiskar. Bendi ykkur sérstaklega á risahumarinn í miðri mynd. Það þarf ekki marga svona til að metta svangan maga. Við flugum í beinu flugi á Fokker Friendship til Brussel og vorum rúma 5 tíma á leiðinni og tæpa 5 tíma á bakaleiðinni. Gárungarnir spurðu okkur hvort við hefðum komið með "Ameríkufluginu". Við vorum bara stoltir af því að koma fljugandi á "landsbyggðarflugvél". Þetta var hið þægilegata flug, þótt við værum aðeins lengur í loftinu miðað við hraðskreiðustu þotur. Náðum að spjalla heilmikið og hrista saman hópinn á leiðinni. Nú svo sluppum við við verkfallsvesinið á Kastrup sem varð mörgum til trafala og tímasóunnar. Þetta er að sögn kunnugra orðin aðalsjávarútvegssýningin í heiminum. Það er gaman að koma þarna og sjá þann þrótt sem býr í íslenskum sjávarútvegi og jafnframt kynnast því hversu víða í heiminum fólk er að veiða, verka og selja fiskafurðir.

Sýningarhöllin í Brussel Það er tilkomumikið sýningarsvæðið í Brussel. Eins og þið sjáið á myndinni var veðrið eindæma gott og komið sumar og allt grænt. Fyrir utan að sýna sjávarafurðir og fiskvinnslutæki er svona sýning einnig vettvangur fyrir fólk í sjávarútvegi til að hittast og blanda saman geði. Það er gert við ýmis tilefni. Skemmtilegasta stundin er á kvöldin á Grand Plaz þegar Íslendingarnir koma saman og fá sér bjórglas og hefja upp raust sína og taka nokkur lög. Það eru sannarlega tilkomumiklar stundir. Þarna hittir maður marga kunningja sem maður hefur haft við samskipti og ryfjar upp gömul kynni. Kveðja.

Vestur í Paradís.

Nei, nei ég er ekki búinn að finna paradís. Var reyndar vestur á Melum í HÍ á fyrirlestraröð í dag sem bar yfirskriftina Vestur í Paradís. Ég er hinsvegar ekki frá því að mamma hafi löngum litið á vesturbæ Reykjavíkur sem sína paradís. Enda uppalin í vesturbænum. Nú en erindin þrjú sem ég hlustaði á nefndust: Draumurinn um fornan frændgarð í Vesturheimi, Um ofurlítinn Edensblett Þórvarar Sveinsdóttur Halldórson hér á jörð og Unnusta fallegra kvæða, um kvenmynd og kvenhylli Stephans G. Konur og einkum skáldkonur dáðust að skáldinu.Þær sáu í honum útlagann, andvökuskáldið, utangarðsmanninn sem þær vildu bjarga. Vera með honum einar upp til fjalla. Þetta var svona Fjalla-Eyvinds "syndrom" eins og einhver sagði. Fyrirlesarinn Helga Kress náði að gæða persónuna holdi - lífi. Maður sá allt í einu manninn á bak við ljóðin. Þannig að maður fékk svona tilfinningu ahhaaaa svona var hann. Niðurstaðan af þessum pælingum var að líklega hafa konur verið hrifnari af Stephan en karlar. Það minnir mig á það að það var hún Stefanía amma mín sem kynnti fyrst fyrir mér Stephan G. Eins og reyndar Laxness, Einar Ben. og fleiri. Annars hef ég verið mest heimavið í dag. Veðrið leiðinlegt eftir hádegi. Rok og rigning. Heimsótti mömmu aðeins á Borgarspítalann og keyrði Sigrúnu í apotekið. Þetta er svona það helsta. Kveðja.

Vikumolar.

Var í tvítugsafmæli Unnar Sveinsdóttur frænku minnar í dag 1. september. Sirrý fær bestu kveðjur á afmælisdaginn sinn sem er í dag, en hún skrapp yfir Pollinn í nokkra daga. Nú það er helst annað í fréttum vikunnar að ég hitti Guðbjörn Þór æskuvin minn hjá Helga og Ingunni í gærkvöldi en hann er hér í nokkra daga heimsókn. Mánudag og þriðjudag var ég á auðlindaráðstefnu á Hótel Sögu. Það er alltaf frískandi að heyra í fræðimönnum spá og spekúlera. Fræðimennirnir veltu því fyrir sér hvernig best væri að nýta fiskmiðin í hafinu og hvað skórinn kreppir að í fiskveiðum í heiminum. Í stuttu máli sagt eru verkefnin óþrjótandi á þeim vettvangi. Tema ráðstefnunar var við hvaða aðstæður mætti ná bestum árangri í nýtingu fiskimiða og ýmissa náttúruauðlinda. Ef hægt er að tala um niðurstöðu á ráðstefnu af þessu tagi þá var hún að mínu viti að besta skipulagið er þegar kraftar markaðarins fá notið sín og nýtingar- og eignarréttur er vel skilgreindur. Í dag fór ég í fyrsta leikfimitíma vetrarins og verður að viðurkennast að maður var dálítið stirður, enda varla búinn að jafna mig eftir hnésnúninginn. Nú fara vetrarverkefnin að byrja hvert á fætur öðru. Kveðja

Tvö fróðleg erindi um RÚV og hnattvæðingu.

Ég hef hlýtt á tvo áhugaverða en ólíka fyrirlestra í þessari viku reyndar báða á þriðjudaginn. Sá fyrri var í Rótarý þar sem útvarpsmaðurinn góðkunni Jónas Jónasson gerði grein fyrir starfi sínu og fyrstu kynnum að RÚV. Hann sagði okkur hvernig RÚV hefur þróast frá árdögum þess og til dagsins í dag. Lýsti ýmsum þjóðkunnum starfsmönnum útvarpsins í gegnum tíðina og lék þá suma og upplýsti hversu frábærir listamenn margir þeirra hefðu verið. Lokapunktur í erindi hans var að RÚV geymdi mikil menningarverðmæti sem mættu ekki glatast. Hinn ræðumaðurinn var Englendingur, mr. Q. Peel sem vinnur við Financial Times, sem hélt erindi á aðalfundi SA. Hann fjallaði um hnattvæðinguna, kosti hennar og galla og mikilvægi fyrir þjóð eins og okkur Íslendinga. Hann kom víða við í erindi sínu og er of langt mál að tíunda það allt saman. Hann minnti á að hnattvæðingin væri ekki sjálfgefin. Það gæti farið svo að bakslag kæmi í hana ef þjóðir heims yrðu hræddar´við þessa þróun. Mikil hætta væri á því að USA mundi draga sig í skel og loka sig af gagnvart umheiminum. Erfið staða þeirra í Írak væri vatn á millu þeirra sem töluðu fyrir einangrunarstefnunni. USA ætti óuppgert um afstöðu sína til Kína þótt viðskipti hefðu aukist mikið og þeir hefðu ótvírætt hagnast á þeim viðskiptum. Evrópusambandið væri valkostur sem Íslendingar ættu að skoða. Smáþjóðir virtust njóta þess að vera innan sambandsins. Þó væru blikur í ýmsum aðildarlöndum vegna þess að hagvöxtur í þeim væri ekki nógu mikill sbr. Þýskaland og Frakkland. Ákveðinn ótti væri við það á vesturlöndum að fólk frá Austur - Evrópu færi að flæða inn á vinnumarkaðinn og gerði stöðuna á vinnumarkaðnum enn erfiðari. Niðurstaða hans var sú að í hnattvæðingin væri staðreynd hún væri aðeins að byrja og væri drifin áfram af nýjustu fjarskiptatækni, símum og netinu. Hnattvæðingin væri langt í frá sjálfgefin aðstæður gætu breyst snögglega og leitt til þess að hún stöðvaðist. Það væri óheppilegt vegna þess að hún leiddi ótvírætt til aukinnar hagsældar í heiminum, líka í hinum fátækari löndum heims. Nefndi hann dæmi um það hversu hlutfall þeirra sem lifa á einum dollara á dag hefði fækkað mikið á síðastliðnum árum. Með því að fara inn á eftirfarandi slóð má hlusta á erindið: http://sa.is. Jæja hef þetta ekki lengra. Kveðja.

Fram fram fylking.

Var á ráðstefnu í gær. Þar voru ýmsir uppar að pæla í framtíðinni. Ísland árið 2015 var yfirskrift fundarins. Fullyrt var að þeir sem setja enga stefnu kæmust ekki spönn frá rassi. Forsætisráðherrann var nokkuð klár á kúrsinum. Hann sér okkur í Evrópusambandinu árið 2015. Aðrir ræðumenn töluðu í klassískum frösum svona blámóðu framboðsstíl, ala "presedenten" í nýjársræðum: aukin menntun, þjónusta, alþjóðvæðing, alþjóðleg fjármálamiðstöð, skattaparadís, minnkun ríkisbáknsins. Framganga ræðumanna og panels einkenndist af öryggi í fasi og framsögn. Við þessir venjulegu þúfulallar sem rákumst þarna inn heyrðum ekki minnst á fisksporða eða lambaspörð. Við gengum með veggjum og furðuðum okkur á hvar þetta fólk hefði öðlast alla þessa visku, þetta öryggi og alla þessa löngu og miklu sýn. Ekki var nú hátt gengi að valda þeim áhyggjum, raunar þvert á móti. Þessar vangaveltur minna mig á þegar menn í "den" í gamla Sóvet voru að gera 5 ára áætlanir sínar, Gosplan, minnir mig að þær hafi verið kallaðar. Þá hlógu allir á vesturlöndum og sögðu að þetta væri nú meiri dellan að búa til áætlanir til svo langs tíma. Þar var meira segja lýst í þaula hvernig ætti að ná þessum áætlunum. Nú drafta menn 9 ára stefnu á svona ráðstefnu og lýsa í almennum orðum hvernig eigi að ná þeim og allir mæna í aðdáun og undrun yfir framsýninni. Tímarnir breytast og mennirnir með. Talandi um sovésku áætlunina minnist ég sögu þar sem lagt var á ráðin í einni áætluninni um að vegna skorts á pottum og pönnum ætti að vera búið að framleiða 17 000 tonn af slíkum tólum innan ákveðins tíma til þess að fullnægja miklum skorti heimilanna. Þegar farið var að kanna hvernig hafði gengið að fylgja áætluninni kom í ljós að enn var mikill skortur á pottum og pönnum á heimilum landsmanna. Hvernig mátti þetta vera, höfðu ekki verið framleidd umrædd tonn af pottum og pönnum eins og áætlunin gerði ráð fyrir? Jú jú, það hafði verið gert. En þegar framleiðendur sáu að þeir gátu aldrei framleitt þetta magn í tonnum af litlum pottum og pönnum til heimilanna framleiddu þeir bara í staðinn stóra potta og pönnur fyrir mötuneyti og hótel. Svona gátu nú áætlanirnar afvegaleitt menn í "sæluríkinu". En þetta á auðvitað ekkert skilt við svona ráðstefnu um stefnumótun til framtíðar eins og haldin var í gær.

Ráðstefna um stjórnarskrána.

Fundur stjórnarskrárnefndar.

Ég var á fundi stjórnarskrárnefndar í dag. Þetta er sú nefnd sem vinnur að endurskoðun stjórnarskrárinnar. Hlustaði á fróðleg erindi nokkurra kennimanna í morgun um lýðræði, þingræði, ríkið og einstaklinginn. Úr sal komu upplýsingar um uppbyggingu þýsku stjórnarskrárinnar en hún miðar að því hvernig hægt sé að standa vörð um virðingu einstaklingsins. Sú íslenska tekur mið af dönsku stjórnarskránni og hefði verið athyglisvert að heyra hvernig sú danska hefur þróast á síðustu öld. Í Stóra - Bretlandi er engin rituð stjórnarskrá til heldur aðeins gögn sem hægt er að vitna til. Þar er það þingið sem ræður. Það var mjög fróðlegt að fylgjast með þeim umræðum sem þarna fóru fram. Víða komið við meðal annars fjallað um þá jákvæðni sem fellst í kristinni trú m.m. Annars lítið að frétta. Maður er aðeins að ná sér eftir Noregsferðina. Sr. Hjörtur og Unnur ásamt Stebbu og Þórunni og Co. eru á Mallorka. Hjörtur og Ingibjörg eru í sumarbústað í Borgarfirði. Kveðjur.

Hafsjór tækifæra...

Ráðstefna í Ålesund

Þá er maður kominn heim frá Ålesund í Noregi. Þetta var mjög eftirminnileg heimsókn. Ráðstefnan sem Íslandsbanki hf. stóð fyrir var í alla staði til fyrirmyndar. Ef maður ætti að taka saman í fáum orðum boðskap ráðstefnunnar þá er hann helst sá að fyrirtækjum í sjávarútvegi fækkar og þau stækka. Þetta ferli mun halda áfram á næstu árum. Sjávarútvegurinn er matvælaframleiðandi sem verður að huga að öllum þáttum virðiskeðjunnar frá veiðum á borð neytandans. Þetta hljómaði allt kunnuglega en ágætt að fara yfir þetta enn einu sinni. Heimsóttum í dag tvö fiskvinnslufyrirtæki í Ålesund sem eru bæði framarlega í sínu sviði. Eftir þá dagskrá var keyrt út á flugvöll og flogið til baka heim í Fokker. Flugið tók á fjórða tíma.

Til Noregs.

Ålesund í Noregi

Kominn til Ålesund í Noregi á ráðstefnu. Flugum kl. 14.15 frá Reykjavíkurflugvelli beint hingað til Ålesund í Fokker frá FÍ. Flugið tók um þrjár klukkustundir. Þægilegt flug en ókyrrð í lofti yfir bænum. Hér munu búa um 40 þúsund manns en alls um 120 þúsund á atvinnusvæði staðarins. Er hér á ráðstefnu sem Íslandsbanki stendur fyrir og stjórn LÍÚ er hér líka. Veðrið var fremur kallt þegar við lentum (sjá mynd) en hefur heldur hlýnað með kvöldinu. Það var móttaka hér í sjómynjasafninu og boðið upp á létta kvöldmáltið. Á eftir að skoða umhverfið betur. Hér er afar fallegt umhverfi og þetta er einn helsti útgerðarbær Norðmanna. Verð í bandi. Kveðja.

Tónleikar og fyrirlestur.

Það er nú vor í lofti hér á Kópavogssvæðinu að vísu svolítill grár slæðingur hérna í kring. Fórum á fyrirlestur í gær á vegum fimleikahópsins: "Karlar í kreppu". Fjallað var um kynjamun. Það var ágætis tilbreyting. Á þriðjudagskvöldið var ég að spila á tónleikum eldri nemanda í píanóskólanum. Spilaði þrjú lög: Sorento, Heima og My Way. Það er alveg ótrúlegt hvað maður getur stressast upp þegar maður er að spila fyrir aðra. Ég hef ekki fengið meira en 6,5 fyrir þá frammistöðu og er vafalaust rausnarlegur við mig. En þetta er ágætis leið til þess að þjálfa sig. Fórum í kvöldkaffi á Hlíðarveginn til prestshjónanna í gærkvöldi. Þetta er nú það helsta. Kveðja.